အပိုင်း (၆၃) : တက္ကသိုလ်ကျောင်းသားဘဝမှ တိမ်းရှောင်နေတဲ့ တက်ကြွလှုပ်ရှားသူဘဝသို့

ရန်ကုန် စီးပွားရေးတက္ကသိုလ်နဲ့  အင်္ဂလန် အောက်စဖို့ဒ်တက္ကသိုလ်တွေမှာ ဘွဲ့ရဖို့ကြိုးစားနေခဲ့တဲ့ ဟန်ထူးခန့်ပိုင်ဟာ တနေ့မှာ ကရင်ပြည်နယ်တောနက်ထဲ ထွက်ပြေးရလိမ့်မယ်လို့ ဘယ်တုန်းကမှ စိတ်မကူးခဲ့မိပါဘူး။

ကျောင်းသားတယောက်သာမကသေးဘဲ ဟန်က ကျောင်းသားသမဂ္ဂရဲ့ ဒုဥက္ကဌတာဝန် ယူထားပါတယ်။ သူက တက္ကသိုလ်ကျောင်းသားများသမဂ္ဂ Universities Student Union (USU) မှာ တက်ကြွတဲ့အဖွဲ့ဝင်တဦးလည်း ဖြစ်ခဲ့ပါတယ်။ ဒီလိုတာဝန်တွေကြောင့် လူမှုအဖွဲ့အစည်းတွေရဲ့ ခေါင်းဆောင်တွေနဲ့ အဆက်အသွယ်ရှိလာခဲ့ပါတယ်။ အထူးသဖြင့် ၈၈ မျိုးဆက် ငြိမ်းချမ်းရေးနှင့်ပွင့်လင်းလူ့အဖွဲ့အစည်းနဲ့ အမျိုးသားဒီမိုကရေစီအဖွဲ့ချုပ် ဖြစ်ပါတယ်။ သူ့သူငယ်ချင်းတွေကတော့ ၂၀၁၀ ခုနှစ် ပြုပြင်ပြောင်းလဲမူများနဲ့ ဖြေလျှော့မှုတွေကို ကျေနပ်အားရနေကြပေမဲ့ ဟန်ကတော့ အပြောင်းအလဲက ခရီးရောက်မှု သိပ်မရှိတဲ့အတွက် သိပ်ပြီးစိုးရိမ်ခဲ့ပါတယ်။

အဆိုးမြင်နေပေမဲ့ အာဏာသိမ်းလိမ့်မယ်လို့ မထင်ခဲ့ပါဘူး။ ၂၀၂၀ ရွေးကောက်ပွဲကို စောင့်ကြည့်ဖို့ Carter Center မှာ အလုပ်လုပ်ခဲ့ပြီး ပုံမှန်မဟုတ်တာ ကြီးကြီးမားမား ဘာတခုမှ မကြုံခဲ့ပါဘူး။ ဖေဖော်ဝါရီ (၁) ရက်နေ့ မနက်စောစောမှာ မဲမသမာမှုလို့စွပ်စွဲပြီး အာဏာသိမ်းလိုက်ပြီလို့ ချစ်သူမိန်းကလေးက သူ့ကို သတင်းပေးလိုက်တဲ့အချိန်မှာ အလွဲကြီးလွဲနေပြီဆိုတာပါဘဲ။ လွန်ခဲ့တဲ့ဆယ်နှစ်က ပိုခမ်းနားတဲ့အဖွင့်ကို ဆန္ဒပြုနေခဲ့ပေမဲ့ NLD က စစ်တပ်ကို အလျှော့ပေး လိုက်လျောဖို့ ဆုံးဖြတ်ချက်ချခဲ့တဲ့အခါမှာ ဒီလိုအဖြစ်ဆိုးကြီး ဖြစ်မလာအောင် တားဆီးဖို့ ဘာတွေလုပ်ခဲ့သင့်သလဲဆိုတာ သူမသိပါဘူး။ သူ့စကားအတိုင်းဆို “သူတို့က ညှိနှိုင်းခွင့် ပေးလိုက်တယ်”ပေါ့။

သူနဲ့ သက်တူရွယ်တူတွေလိုပဲ ချက်ချင်း တုံ့ပြန်ခဲ့ပါတယ်။ အာဏာသိမ်းစရက်တွေမှာ သူက USU ကျောင်းသားဟောင်းများနဲ့ဖွဲ့စည်းထားတဲ့ မြန်မာပြည်ဒီမိုကရေစီ ပြန်လည်ထူထောင်ရေးအတွက် အထူး ရည်စူးထားတဲ့ Burma Spring Front for Federal Democracy ကို ပူးပေါင်းတည်ထောင်လိုက်ပါတယ်။ နိုင်ငံရေးကော်မတီရဲ့ အလုပ်အမှုဆောင်အဖွဲ့ဝင်တဦးအဖြစ်အပြင် Foreign Relations Officer အနေနဲ့ တာဝန်ယူထားပါတယ်။ ဖေဖော်ဝါရီနဲ့ မတ်လထဲမှာ လုပ်ခဲ့တဲ့ ၂၂၂၂၂ လူထုစုဝေးမှုကြီးနဲ့ တပတ်ကြာပြီးနောက် Milk Tea Alliance ဆန္ဒပြပွဲတွေလိုမျိုး တိုင်းပြည်ရဲ့အကြီးမားဆုံးသော ဆန္ဒပြပွဲတချို့ကို စီစဉ်တဲ့အခါ အရေးပါတဲ့နေရာက ပါဝင်ခဲ့ပါတယ်။ 

မျှော်လင့်ထားတဲ့အတိုင်း ဟန်နဲ့ သူ့အဖွဲ့ဝင်လှုပ်ရှားသူတွေလည်း ရှေးမနှောင်းဘဲ စစ်တပ်ရဲ့ ပစ်မှတ်ဖြစ်လာပါတယ်။ ဟန်က လွတ်မြောက်အောင် ကြိုးစားခဲ့ပြီး ကံကောင်းခဲ့ပါတယ်။ သူတို့လမ်းထဲ စစ်သားတွေ ရှာဖွေတဲ့နေ့မှာပဲ လုံခြုံတဲ့အိမ်တအိမ်ကို ပြောင်းခဲ့ပါတယ်။ လုပ်ဖော်ကိုင်ဖက် ကိုးယောက်ကတော့ ကံမကောင်းစွာဘဲ မတရားဖမ်းဆီးခါ်ဆောင်သွားခံရပြီး အကျဉ်းချခံရပါတယ်။ နောက်ပိုင်း ကြားရသမျှ သတင်းတွေကတော့ သူ့သူငယ်ချင်း မိန်းကလေးတွေ လိင်ပိုင်းဆိုင်ရာ အနိုင်ကျင့်စော်ကားခံရပြီး သူငယ်ချင်း ယောက်ျားလေးတွေကတော့ လှဲအိပ်ဖို့ မရနိုင်လောက်အောင် အရိုက်ခံထားရပါတယ်။ အားလုံးကဆက်ပြီး အကျဉ်းချခံထားရဆဲပါ။

ဟန်က နောက်ဆုံး ကရင်ပြည်နယ်ဘက် ထွက်ပြေးခဲ့ပြီး အဲ့ဒီက ကရင်အမျိုးသားအစည်းအရုံး Karen National Union (KNU) ရဲ့ ကာကွယ်မှုအောက်မှာ အခြားထွက်ပြေးလွတ်မြောက်လာသူတွေနဲ့အတူ နှစ်လကြာ နေထိုင်ခဲ့ပါတယ်။ ခက်ခဲတဲ့အခြေအနေတွေကြား သူ့ရဲ့လှုပ်ရှားမှုကို အဝေးကနေ ဆက်လုပ်ခဲ့ပါတယ်။ လျှပ်စစ်မီးလည်း မရှိသလောက်နဲ့ တချို့ရက်တွေ စားစရာမရှိဘဲ ဖြတ်သန်းရပါတယ်။ အင်းစက်ပိုးမွှား အနှောင့်အယှက်တွေနဲ့ သားရိုင်းတိရစ္ဆာန်တွေရဲ့ အန္တရာယ်တွေက အမြဲရှိနေပြီး ကုန်ကုန်ပြောရရင် တပ်မတော်က အနီးနားကရွာတွေနဲ့ သူတို့စခန်းကို လေကြောင်းကနေ အငိုက်ဖမ်း တိုက်ခိုက်မှုတွေကြောင့် ချက်ချင်းထွက်ပြေးဖို့နဲ့ လုံခြုံမယ့်နေရာ ရှာဖွေရပါတယ်။  

ဒီလို အင်မတန်နာကျင်ဖွယ်ရာကောင်းလှတဲ့ ဇာတ်လမ်းကို ထပ်ဆောင်းရရင် ကျနော်တို့ ၂၀၁၀ ခုနှစ်များက အဖြစ်အပျက်တွေနဲ့ ပတ်သက်ပြီး ကျယ်ပြန့်တဲ့ အကြောင်းအရာစုံအောင် ဆွေးနွေးထားပါတယ်။ ရိုဟင်ဂျာအရေးအခင်း သာမက ဗမာမိတ်ဆွေတွေက ဖြစ်လာတာတွေအပေါ် အဝေဖန်မခံလိုမှုနဲ့  အကြင်နာတရား ခေါင်းပါးမှုတွေက သူ့ကို အတော်လေး စိတ်ပျက်စေပါတယ်။ “ကျနော်တို့ ဘာအတွက် ရုန်းကန်နေရသလဲ ချက်ချင်း မေ့သွားကြပြီးတော့ တကယ့်တန်ဖိုးကြီးတဲ့အရာတွေက အမေ့ခံလေးတွေ ဖြစ်သွားကြရပြီ”လို့ ပြောပါတယ်။ တချို့တွေက ပိုကောင်းတဲ့ ရုပ်ဝတ္ထု ဆုလာဘ်တွေအတွက် ရလာတဲ့ အခွင့်အလမ်းအသစ်တွေမှာ သာယာနေကြတယ်။ ခက်ခက်ခဲခဲရထားတဲ့ အောင်မြင်မှုရဲ့တန်ဖိုးကို မြတ်နိုးမှုမရှိဘူး။ ဘာသာရေးအရလည်း သဘာထားမကြီးကြဘူး။ အခြေခံလွတ်လပ်မှုတွေနဲ့ လွတ်လပ်စွာ ထုတ်ဖော်ပြောဆိုပိုင်ခွင့်ကို အလွဲသုံးစားလုပ်တဲ့ဘက်ကို ဦးတည်လာတယ်လို့ သူခံစားမိပါတယ်။    

စိတ်မကောင်းစွာပဲ၊ ဟန်ရဲ့ အံ့ဩစရာအကောင်းဆုံး ဖွင့်ဟချက်တွေထဲမှာ ဝန်ခံထားတာတခုက “ကျနော် ဒီလိုပြောရလို့ တော်တော်လေး စိတ်မကောင်းပါဘူး၊ အာဏာသိမ်းမှု ဖြစ်သွားတာ ကောင်းတယ်လို့တောင် ခံစားရတယ်။ ဘာလို့လဲဆိုတော့ ဒီရင်ကြားစေ့ရေးဆိုတာကြီးက အလုပ်မဖြစ်ခဲ့ဘူးဆိုတာ သက်သေပြလိုက်တာပဲလေ။”

နောက်ဆုံးအနေနဲ့ ဒီရက်တွေမှာ သတင်းအတိအကျရဖို့ ခက်တဲ့အတွက် စိုးရိမ်ကြောင်း ဟန်က ပြောပါတယ်။ စစ်တပ်က သတင်းမှားတွေ တက်တက်ကြွကြွ ဖြန့်ချီနေပြီး ကောလဟလတွေလည်း လူမှုကွန်ယက်တွေမှာ ပျံ့နေပါတယ်။ ထပ်ပြောရင် မျှော်လင့်ချက်အမှားတွေ မြင့်တက်လာတာကြောင့် စိတ်စေတနာဖြောင့်မတ်တဲ့ တက်ကြွလှုပ်ရှားသူတွေ ကံဆိုးမိုးမှောင်ကျပြီး ဒုက္ခတွေ ဖြစ်နေရတာက တကယ့်ကို စိုးရိမ်ရတဲ့ပြဿနာ၊ တခြားတဖက်က တမင်တကာနာမည်ကြီးအောင် ရေးထားတဲ့ လုပ်ဇာတ်သတင်းတွေက ပြည်သူတွေကို ဒုက္ခရောက်စေပါတယ်။ သူ့အမြင်က တကယ်သိဖို့လိုအပ်တဲ့သတင်းကို အကန့်အသတ်နဲ့သိနေရတာထက် တိကျတဲ့သတင်းတွေရနေတာက တကယ်အရေးမကြီးပါဘူး။ “ကိုယ့်ကိုယ်ကိုယ် ထိန်းချုပ်ဖို့လိုတယ်။ သတင်းတွေ အားလုံးသိဖို့ မလိုအပ်ပါဘူး။ သိရင် ပိုပြီးတောင် အန္တရာယ်ရှိတယ်။”လို့ ရိုးရိုးလေးပြောပါတယ်။